"Waraabaa ayaan yidhi"

Tan iyo 1960kii, markii ololihii ururada gobonimo-doonku isu rogeen xisbiyo, tartan iyo loolan adag ugala talada iyo gacan ku haynta waddanka, waxa ina soo maray madax iyo hogamiyayaal kala duwan oo kala daran.

Marka laga reebo masuuliyiinta aan weli la tijaabin, waxa marag ma doon ah, in hungo,haydaar iyo halaag laga dheefsaday madaxdii la tijaabiyey.

Si kasta oo ay ahaataba,waxa jira arrimo ay ka simanyihiin badiba siyaasiyiinta somalidu, waxana kamida:

Nin-jeclaysi

Kala qoqob

Ballan-qaadyo barkumataal ah

musuq

xukun jacayl.

Nin faylasuuf ah ayaa yidhi: " ololaha iyo abaabulka ka horeeya doorashada; siyaasigu waa ruux farta kuu lula, doorashada kadibna wuxu lulaa kalsoonidii aad ku qabtay."

Abwaan ibraahim sh.saleeban"gadhle " oo ahaa hal-abuur reer jabuuti ah, ayaa isagoo tilmaamaya ereyada jiibta iyo jaanta wata ee siyaasigu ku beerla xawsado bulshada, kuna sifeeyey waraabihii yidhi:" waxan rabaa in lay baxsho magaca aamiin" ayaa yidhi :

Abaandulayaashii
Ina soo abaabulay
Shalay olalaheeniyo
Orta iyo cayaaraha.
Addin bay ku tumayeen
midna iimaybuu jiray
In amuurtu taa tahay
Aan idiin asteeyee
Ayaxii hadduu tagay
Ugxantii dillaacdaa
Ummadda umarkhaatiya

Waraabaa ayaan yidhi
Haddaad igu ogaydeen
Baadida islaamkiyo
Anoo aaran geel cuna
Iimaan la'aantii
istaaqfurula baan idhi
Aamiin baanan kala baxay
magacii Inkaarnaa

Isagoo ujeedo leh
Orgibaa ninbaa gawracay
Indhashuu usadhay laan
Waa amaanadaadee
Sii ilaali buu yidhi

markuu tegay islaankii
Inyar haddii uu maqan yahay
Agagaas dhurwaagii
Amba-qaad talaabada
Hadba soo ogaal durug
Eeg-eeg hilbaha dagan
Ursay jeenyihii hore
Wuxu yidhi udgoonaa

Amarrow markii xigay
Af balaadhan kala qaad
Carrab ooman soo saar
Awlalada ka leef-leef
Wuxu yidhi alleylehe
Oon xalaala baan helay
Aadbuu cantuugada
Adhaxda uga buuxsaday
Kolay araracdii tahay
Alamsay laf iyo jiidh
Inyar neefkii kama tegin

Duqa imashadiisii
Eedaysanihii bood
Oodiyo dhirtii jiidh
Ereybaase laga helay
Ku arooray maahmaah
Isagoo ordaayoo
Afar-qaadayuu yidhi
Waxaad igu ogaateen
Wixii aan ahaan jiray

Gaarriyoow ma' iishoow
Uf qabiilkii aad tidhi
Hadduu adiga kuu uray
Ragbaa jira ku uunsada
markuuse aarku soociyo
Haddaan eelo-weyntiyo
Aarankaygu iga didin
Waan ka aarsanlaa doqon
Intase aan afkaartiyo
Aragtidu midays nayn
nacas weyga adag yahay.

Tixdan jiiftada ahi waxay ina tusinaysaa:

In siyaasigu yahay dhurwaa raba, in lagu aamino xoolaha danyarta iyo dad weynaha somaliyeed.

in marka la tijaabiyo laga dhaxlo tacab la'aan iyo musuq.

in qabyaalada iyo qabiilku yahay arrin ay ku meelmaraan, kana dhigtaan garab iyo gashaan IWM.

Ilaahay(SWT) ha inoo hagaajiyo hogamiyayaasha aan weli la tijaabin ee ay hortaallo hawsha adagi, bulshadana waxa waajib ku ah, inay hareer istaagto madaxda daacada ah, waxana lama huraan ah in la horjoogsado halis kasta oo soo wajahda hiigsiga soo iftiimay.

WQ: sakariye yuusuf cigaal.